स्थान: Kolhapur
वार्ताहर: साहिल येरने
इचलकरंजी शहरात एका अल्पवयीन मुलीचा पाठलाग करून विनयभंग केल्याप्रकरणी अटक करण्यात आलेल्या संशयिताच्या मोबाईल तपासणीतून आणखी एक धक्कादायक व गंभीर प्रकार समोर आला आहे. संशयित आरोपीच्या मोबाईलमध्ये दुसऱ्या एका तरुणीची छायाचित्रे मिळून आल्यानंतर पोलिसांनी सखोल चौकशी केली असता, संबंधित तरुणीला छायाचित्रे व्हायरल करण्याची धमकी देऊन तिच्यावर वारंवार लैंगिक अत्याचार करण्यात आल्याचे निष्पन्न झाले आहे. याप्रकरणी पीडित तरुणीने दिलेल्या तक्रारीच्या आधारे जाहिद जमीर नांदणीवाले (वय २०, रा. झेंडा चौक, गावभाग, इचलकरंजी) याच्याविरुद्ध शिवाजीनगर पोलिस ठाण्यात बलात्काराचा स्वतंत्र गुन्हा दाखल करण्यात आला आहे.
गावभाग पोलिसांनी काही दिवसांपूर्वी एका अल्पवयीन विद्यार्थिनीचा पाठलाग आणि विनयभंग केल्याच्या आरोपावरून जाहिद नांदणीवाले याला अटक केली होती. ही कारवाई पूर्ण झाल्यानंतर तपास प्रक्रियेचा भाग म्हणून पोलिसांनी संशयिताचा मोबाईल जप्त करून त्याची बारकाईने तपासणी सुरू केली. मोबाईलमधील डेटा तपासत असताना तपास अधिकाऱ्यांना शहरात राहणाऱ्या अन्य एका तरुणीची छायाचित्रे आढळून आली. ही छायाचित्रे संशयास्पद वाटल्याने पोलिसांनी या दिशेने चौकशीची चक्रे वेगाने फिरवली आणि संबंधित तरुणीशी संपर्क साधून माहिती घेतली. त्यावेळी संशयित आरोपीने ब्लॅकमेलिंगच्या माध्यमातून लैंगिक शोषण केल्याची विदारक हकीकत समोर आली.
पीडित तरुणीने शिवाजीनगर पोलिस ठाण्यात दिलेल्या सविस्तर फिर्यादीनुसार, संशयित जाहिद हा जुना चंदूर रोड परिसरातील एका कारखान्यात वाइंडिंगचे काम करतो. त्याने १२ जून २०२५ ते नोव्हेंबर २०२५ या कालावधीत फिर्यादी तरुणीशी मैत्रीचा बहाणा करून जवळीक साधली होती. या मैत्रीच्या काळात त्याने तरुणीची काही वैयक्तिक छायाचित्रे आपल्या मोबाईलमध्ये घेतली होती. त्यानंतर काही दिवसांनी आरोपीच्या वर्तनाबाबत संशय आल्याने तरुणीने ती छायाचित्रे मोबाईलमधून काढून टाकण्यास सांगितले. छायाचित्रे डिलीट करतो असे भासवून आरोपीने तिला जुना चंदूर रोडवरील बरगे मळा परिसरात असलेल्या वाइंडिंगच्या कारखान्यात भेटण्यासाठी बोलावून घेतले.
तरुणी कारखान्यात पोहोचल्यानंतर आरोपीने छायाचित्रे डिलीट करण्यासाठी तिच्याकडे शरीरसुखाची थेट मागणी केली. पीडित तरुणीने या अयोग्य मागणीला ठाम विरोध दर्शवला आणि तिथून निघून जाण्याचा प्रयत्न केला. मात्र, आरोपीने तिचे फोटो सोशल मीडियावर व्हायरल करण्याची आणि नातेवाईकांपर्यंत पोहोचवण्याची धमकी दिली. छायाचित्रे सार्वजनिक झाल्यास समाजात बदनामी होईल या भीतीपोटी तरुणी असहाय झाली. या परिस्थितीचा गैरफायदा घेत संशयिताने तिच्यावर कारखान्यात जबरदस्तीने लैंगिक अत्याचार केला.
या घटनेनंतरही संशयित आरोपीची ब्लॅकमेलिंग थांबली नाही. त्याने तरुणीला दिलेली छायाचित्रे डिलीट करण्याचे आश्वासन पाळले नाही. त्याउलट, ती छायाचित्रे स्वतःजवळच ठेवून तरुणीला धमकावणे सुरूच ठेवले. जेव्हा जेव्हा बोलावले जाईल तेव्हा हजर राहावे लागेल, नकार दिल्यास छायाचित्रे सर्वत्र व्हायरल करून बदनामी केली जाईल, अशी सातत्याने भीती दाखवून त्याने वेळोवेळी तिचे लैंगिक शोषण केले. भीती आणि सामाजिक दबावामुळे पीडित तरुणीने हा प्रकार कोणालाही सांगितला नव्हता. मात्र, संशयिताला दुसऱ्या गुन्ह्यात अटक झाल्यानंतर आणि पोलिसांना मोबाईलमधील छायाचित्रे मिळाल्यानंतर तरुणीने पुढे येत शिवाजीनगर पोलिसांत अधिकृत तक्रार नोंदवली.
यापूर्वी आरोपी जाहिद याच्यावर गावभाग पोलिस ठाण्याच्या हद्दीत एका १७ वर्षीय अल्पवयीन विद्यार्थिनीचा पाठलाग केल्याप्रकरणी गुन्हा दाखल झालेला आहे. वर्धमान चौक, चाटे एज्युकेशन, भगतसिंग बाग आणि वर्षा फिटनेस परिसरात संशयिताने अल्पवयीन विद्यार्थिनीचा पाठलाग करून तिचा विनयभंग केला होता. या तक्रारीनंतर गावभाग पोलिसांनी त्याला अटक करून न्यायालयासमोर हजर केले होते. न्यायालयाने त्याची रवानगी न्यायालयीन कोठडीत केली होती.
गावभाग पोलिसांच्या गुन्ह्यात संशयित जाहिद नांदणीवाले हा सध्या न्यायालयीन कोठडीत असून, आता शिवाजीनगर पोलिस ठाण्यात त्याच्यावर बलात्कार आणि धमकी दिल्याप्रकरणी गंभीर गुन्हा दाखल करण्यात आला आहे. शिवाजीनगर पोलिस ठाण्याचे पोलिस निरीक्षक शरद मेमाणे यांनी दिलेल्या माहितीनुसार, पीडितेच्या तक्रारीवरून गुन्हा नोंदवण्यात आला असून न्यायालयीन प्रक्रियेनुसार संशयिताचा ताबा घेण्यासाठी कायदेशीर अर्ज करण्यात आला आहे. ताबा मिळाल्यानंतर या गुन्ह्यातील घटनास्थळाची पाहणी, मोबाईल फॉरेन्सिक तपास आणि इतर साक्षीदारांचे जबाब नोंदवण्याची पुढील कारवाई केली जाईल.
इचलकरंजीसारख्या औद्योगिक शहरात एकाच संशयिताकडून अशा प्रकारे अल्पवयीन मुलींचा पाठलाग करणे आणि तरुणींना फोटोंच्या माध्यमातून ब्लॅकमेल करून त्यांचे लैंगिक शोषण करण्याचे एकापाठोपाठ एक प्रकार उघडकीस आल्याने खळबळ उडाली आहे. या दोन्ही प्रकरणांचा शिवाजीनगर व गावभाग पोलीस ठाण्यांकडून अधिक तपास सुरू आहे.
Leave a Reply