स्थान: Pune
वार्ताहर: साहिल येरने
पिंपरी-चिंचवड शहर भारतीय जनता पार्टीच्या संघटनात्मक रचनेमध्ये मोठा आणि महत्त्वपूर्ण बदल करण्यात आला असून, पक्षाचे ज्येष्ठ, अभ्यासू तसेच निष्ठावंत कार्यकर्ते संजय संपतलाल पटनी यांची शहर जिल्हा सरचिटणीसपदी नियुक्ती करण्यात आली आहे. पिंपरी-चिंचवड भाजप शहराध्यक्ष तथा माजी नगरसेवक शत्रुघ्न बापू काटे यांच्या हस्ते संजय पटनी यांना या महत्त्वाच्या जबाबदारीचे अधिकृत नियुक्तीपत्र नुकतेच सन्मानपूर्वक प्रदान करण्यात आले. आगामी महापालिका निवडणुका आणि संघटनात्मक बांधणीच्या दृष्टीने पक्षाने घेतलेला हा निर्णय अत्यंत प्रभावी आणि दूरगामी ठरेल अशी चर्चा राजकीय वर्तुळात सुरू आहे. या नियुक्तीप्रसंगी भोसरी विधानसभेचे आमदार महेश लांडगे, संघटन सरचिटणीस मोरेश्वर शेडगे, सरचिटणीस विकास डोळस, मंडलाध्यक्ष शिवराज लांडगे, ज्येष्ठ पदाधिकारी उदय गायकवाड, सागर गवळी यांच्यासह पक्षातील प्रमुख पदाधिकारी आणि कार्यकर्ते मोठ्या संख्येने उपस्थित होते. पिंपरी-चिंचवड शहरामध्ये भारतीय जनता पार्टीचा विस्तार वेगाने होत असताना पक्षाला संघटन कौशल्य, जनसंपर्क आणि प्रशासकीय विषयांची उत्तम जाण असणाऱ्या नेतृत्वाची गरज होती. संजय पटनी यांनी गेल्या अनेक वर्षांत पक्षाच्या विविध पदांवर राहून दाखवलेली संघटनात्मक चुणूक आणि तळागाळातील कार्यकर्त्यांशी जोडून ठेवलेला संवाद लक्षात घेऊन पक्षनेतृत्वाने त्यांच्या खांद्यावर सरचिटणीस पदाची धुरा सोपवली आहे. या नियुक्तीनंतर बोलताना शहराध्यक्ष शत्रुघ्न काटे म्हणाले की, संजय पटनी हे पक्षाचे अत्यंत निष्ठावंत, शांत, संयमी, अभ्यासू आणि कार्यक्षम कार्यकर्ते आहेत. त्यांनी पक्षाच्या प्रत्येक अभियानात आणि आंदोलनात नेहमीच आघाडीची भूमिका निभावली आहे. त्यांच्या दीर्घ अनुभवाचा, प्रशासकीय माहितीचा आणि उत्तम संघटन कौशल्याचा मोठा फायदा पिंपरी-चिंचवड शहरातील पक्षाच्या आगामी वाटचालीला आणि विस्तारासाठी निश्चितपणे होणार आहे. शहराच्या प्रत्येक प्रभागामध्ये पक्षाची पाळेमुळे अधिक घट्ट करण्यासाठी पटनी यांच्यासारख्या अनुभवी नेत्यांची सक्रियता पक्षसंघटनेला अधिक बळकटी देईल, असा विश्वास काटे यांनी व्यक्त केला. आमदार महेश लांडगे यांनी देखील संजय पटनी यांच्या नियुक्तीबद्दल आनंद व्यक्त करत त्यांचे विशेष अभिनंदन केले. लांडगे म्हणाले की, संजय पटनी हे गेल्या दोन दशकांपासून सामाजिक आणि राजकीय वाटचालीत अत्यंत विश्वासू सहकारी म्हणून सातत्याने सोबत राहिले आहेत. कोणतीही अपेक्षा न ठेवता पक्षाचे काम प्रामाणिकपणे करणे ही त्यांची ओळख आहे. कोणत्याही मोठ्या पदाची हाव न धरता केवळ पक्षहिताला प्राधान्य देणाऱ्या अशा निष्ठावान कार्यकर्त्याचा गौरव करून पक्षाने त्यांच्या निष्ठेला खरा न्याय दिला आहे. आगामी काळात शहराच्या विकासामध्ये आणि जनहिताच्या कामांमध्ये पटनी यांचे योगदान अत्यंत मोलाचे ठरेल, असे लांडगे यांनी नमूद केले. नव्या जबाबदारीबद्दल कृतज्ञता व्यक्त करताना नवनियुक्त सरचिटणीस संजय पटनी म्हणाले की, पिंपरी-चिंचवड शहर जिल्हा भाजपाच्या सरचिटणीसपदाची जबाबदारी देऊन पक्षाच्या वरिष्ठ नेतृत्वाने आणि स्थानिक नेत्यांनी माझ्यावर जो विश्वास दाखवला आहे, त्याबद्दल मी पक्षाचा मनःपूर्वक आभारी आहे. शहरातील प्रत्येक सामान्य नागरिकाचे प्रश्न सोडवणे, पक्षाची ध्येयधोरणे आणि केंद्र व राज्य सरकारच्या जनकल्याणकारी योजना घराघरापर्यंत पोहोचवणे हेच माझे प्रमुख उद्दिष्ट राहील. शहराध्यक्ष, सर्व आमदार आणि ज्येष्ठ पदाधिकाऱ्यांच्या मार्गदर्शनाखाली पक्षसंघटन तळागाळात अधिक मजबूत करण्यासाठी मी पूर्ण ताकदीने काम करेन आणि मिळालेला हा विश्वास समर्पित कार्यातून सार्थ ठरवेन. संजय पटनी यांच्या राजकीय आणि सामाजिक पार्श्वभूमीचा विचार केला तर त्यांचा पिंपरी-चिंचवड शहरात मोठा जनसंपर्क असल्याचे दिसून येते. यापूर्वी त्यांनी शहर भाजपचे प्रसिद्धीप्रमुख आणि वरिष्ठ उपाध्यक्ष यांसारखी महत्त्वाची पदे अत्यंत जबाबदारीने सांभाळली आहेत. पक्षाचे अधिकृत विचार माध्यमांपर्यंत पोहोचवण्यात आणि विरोधकांच्या आरोपांना अभ्यासू पद्धतीने उत्तर देण्यात त्यांनी महत्त्वाची भूमिका बजावली होती. याशिवाय पंतप्रधान नरेंद्र मोदी यांच्या ‘मन की बात’ कार्यक्रमाचे भोसरी विधानसभा मतदारसंघातील सर्व ४८३ मतदान केंद्रांवर म्हणजेच बूथवर सलग चार महिने शंभर टक्के यशस्वी आयोजन करण्यात त्यांनी मुख्य समन्वयकाची भूमिका पार पाडली होती. त्यांच्या या नियोजनबद्ध आणि शिस्तबद्ध कामगिरीचे पक्षश्रेष्ठींकडून विशेष कौतुक करण्यात आले होते. संजय पटनी यांचा पिंपरी-चिंचवड परिसरातील राजस्थानी, मारवाडी आणि उत्तर भारतीय हिंदीभाषिक समाजात मोठा प्रभाव आणि दांडगा संपर्क आहे. याशिवाय स्थानिक व्यापारी वर्ग, व्यावसायिक आणि सामाजिक संस्थांमध्येही त्यांची प्रतिमा अत्यंत स्वच्छ, सुसंस्कृत आणि समन्वयवादी नेता म्हणून ओळखली जाते. शहरातील विविध समाजांना पक्षप्रवाहात एकत्र आणण्यासाठी त्यांच्या संपर्काचा मोठा फायदा भाजपला होत आला आहे. सध्याच्या राजकीय स्थितीत पिंपरी-चिंचवड महापालिकेची आगामी रणधुमाळी लक्षात घेता, संजय पटनी यांच्या नियुक्तीमुळे शहर भाजपच्या कोअर टीमला नवी ऊर्जा मिळाली असून पक्षाचे संघटनात्मक जाळे अधिक विस्तारण्यास निश्चितच मोठी गती मिळणार आहे.
Leave a Reply