स्थान: न्यू दिल्ली
वार्ताहर: साहिल येरने
नवी दिल्लीतील टिळक नगर आणि विकासपुरी परिसरात रस्त्याच्या कामाची गुणवत्ता तपासणी सुरू असताना दिल्लीचे सार्वजनिक बांधकाम विभाग अर्थात पीडब्ल्यूडी मंत्री प्रवेश वर्मा आणि एका स्थानिक युवकामध्ये झालेल्या कथित वादाने राजधानीतील राजकीय वातावरण चांगलेच तापले आहे. रस्त्याच्या निकृष्ट दर्जाबाबत व्हिडिओ रेकॉर्डिंग करत असताना भाजपचे मंत्री प्रवेश वर्मा यांनी आपल्याला मारहाण केली आणि मोबाईल फोन हिसकावून घेतला, असा गंभीर आरोप आम आदमी पक्षाच्या स्थानिक आमदाराच्या सोशल मीडिया टीमशी संबंधित असलेल्या साहेब सिंह या २२ वर्षीय युवकाने केला आहे. या घटनेचा व्हिडिओ समाजमाध्यमांवर वेगाने व्हायरल झाल्यानंतर आम आदमी पक्ष आणि भारतीय जनता पक्ष यांच्यातील राजकीय संघर्ष अधिक तीव्र झाला असून दोन्ही बाजूंकडून एकमेकांवर गंभीर स्वरूपाचे आरोप केले जात आहेत. पश्चिम दिल्लीतील आउटर रिंग रोड परिसरातील विकासपुरी व टिळक नगर भागातील रस्त्याच्या डांबरीकरणाच्या कामाची गुणवत्ता तपासण्यासाठी ही पाहणी आयोजित करण्यात आली होती. स्थानिक आमदार जरनैल सिंह यांच्या उपस्थितीत रस्त्याचे काम निकृष्ट दर्जाचे असल्याचे दाखवून दिले जात होते. या पाहणीदरम्यान रस्त्यावरील डांबराचा थर हाताने सहज निघत असल्याचे दाखवले जात असताना, तेथील घडामोडींचे थेट प्रक्षेपण करणाऱ्या साहेब सिंह या युवकावर मंत्र्यांनी हात उचलल्याचा दावा केला जात आहे. या अनपेक्षित घटनेनंतर घटनास्थळी काही काळ गोंधळाचे वातावरण निर्माण झाले. या संपूर्ण प्रकारानंतर संबंधित युवकाने थेट स्थानिक विकासपुरी पोलीस ठाण्यात धाव घेऊन पीडब्ल्यूडी मंत्र्यांविरोधात अधिकृत लेखी तक्रार दाखल केली आहे. साहेब सिंह याने घडलेल्या प्रसंगाबाबत आपली सविस्तर भूमिका मांडताना सांगितले की, पीडब्ल्यूडी विभागाकडूनच रस्त्याच्या प्रत्यक्ष स्थितीची पाहणी करण्यासाठी बोलावण्यात आले होते. आमदार जरनैल सिंह यांच्या सूचनेनुसार आपण या संपूर्ण पाहणीचे थेट व्हिडिओ रेकॉर्डिंग करत होतो. साहेब सिंहच्या म्हणण्यानुसार, जेव्हा रस्त्याचा पृष्ठभाग अत्यंत तकलादू आणि निकृष्ट असल्याचे दाखवले जात होते, तेव्हा मंत्री प्रवेश वर्मा अत्यंत संतप्त झाले. साहेब सिंहने असा आरोप केला आहे की, मंत्र्यांनी अचानक त्याच्या हातातील मोबाईल फोन हिसकावून घेतला आणि त्याच्यावर हात उचलला. एवढेच नव्हे तर मंत्र्यांच्या सुरक्षा रक्षकांनी त्याचा गळा दाबण्याचा प्रयत्न केला आणि सोबतच्या कार्यकर्त्यांनी त्याला जीवे मारण्याची धमकी दिली. आपण कोणालाही कोणतीही शिवीगाळ केली नसून केवळ लोकप्रतिनिधींच्या सूचनेनुसार रस्त्याच्या कामाचे वास्तव कॅमेऱ्यात टिपत होतो, असा दावा साहेब सिंहने केला आहे. दुसऱ्या बाजूला, सार्वजनिक बांधकाम मंत्री प्रवेश वर्मा यांनी या प्रकरणावर स्पष्टीकरण देताना समाजमाध्यमांवर व्हायरल झालेला व्हिडिओ अपूर्ण आणि संदर्भाशिवाय प्रसारित केला जात असल्याचा प्रतिदावा केला आहे. मंत्र्यांच्या म्हणण्यानुसार, टिळक नगर भागातील रस्त्याच्या कामाबाबत स्थानिक आमदार कंत्राटदारावर अनावश्यक दबाव आणून कमिशनची मागणी करत होते आणि त्यात अपयश आल्याने विभागाची नाहक बदनामी करण्याचा प्रयत्न सुरू होता. पाहणीदरम्यान आमदारांसोबत आलेल्या कार्यकर्त्यांनी आपल्याला आणि आपल्या कुटुंबाला उद्देशून अत्यंत अश्लील व आक्षेपार्ह शिवीगाळ केली, असा आरोप प्रवेश वर्मा यांनी केला. या अचानक झालेल्या प्रक्षोभक वर्तनामुळे आणि तणावाच्या क्षणी स्वतःवरचे नियंत्रण सुटल्याने हात उचलला गेला, असे सांगतानाच सार्वजनिक जीवनात अशा प्रकारची कृती घडायला नको होती, असेही त्यांनी नमूद केले. या संपूर्ण प्रकरणात दोन्ही बाजूंकडून परस्परविरोधी दावे करण्यात आल्यामुळे नेमकी परिस्थिती काय होती याविषयी मतभेद कायम आहेत. साहेब सिंहने मंत्र्यांचा शिवीगाळीचा दावा पूर्णपणे फेटाळून लावला असून संपूर्ण घटनेचे थेट प्रक्षेपण सुरू असल्यामुळे गैरवर्तनाचा प्रश्नच उद्भवत नाही असे स्पष्ट केले आहे. दुसरीकडे, भाजपच्या गोटातून आणि पोलिसांच्या प्राथमिक माहितीनुसार साहेब सिंह याच्यावर यापूर्वी महापालिकेच्या एका सफाई कर्मचाऱ्याला मारहाण केल्याप्रकरणी गुन्हा दाखल असून तो जामिनावर बाहेर असल्याचे सांगण्यात आले आहे. त्यामुळे अशा पार्श्वभूमीच्या व्यक्तीकडून मंत्र्यांना जाणीवपूर्वक डिवचण्याचा प्रयत्न झाला होता का, या दिशेनेही चर्चा सुरू झाली आहे. या राजकीय वादामुळे दिल्लीतील रस्ते विकासकामांचा दर्जा आणि लोकप्रतिनिधींचे सार्वजनिक वर्तन या दोन्ही मुद्द्यांवर व्यापक चर्चा सुरू झाली आहे. आगामी काळात या प्रकरणात पोलीस तपासातून काय निष्पन्न होते, याकडे राजकीय विश्लेषकांचे लक्ष लागले आहे.
Leave a Reply